സപ്ലൈകോ ഓണം ഫെയറുകളുടെ സംസ്ഥാനതല ഉദ്ഘാടനം

തിരുവനന്തപുരം : 

വിലക്കുറവോടെ ഓണാഘോഷത്തിന് ഭക്ഷ്യ ഉൽപന്നങ്ങൾ ലഭ്യമാക്കാൻ ഒരുക്കിയ സപ്ലൈകോ ഓണം ഫെയറുകളുടെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. 

സെപ്റ്റംബർ നാലു വരെയാണ് ജില്ലാ ഫെയറുകൾ സംഘടിപ്പിക്കുക. എല്ലാ നിയോജക മണ്ഡലങ്ങളിലും ഓഗസ്റ്റ് 31 മുതൽ സെപ്റ്റംബർ നാലുവരെ  ഒരു പ്രധാന ഔട്ട്‌ലെറ്റിനോട് അനുബന്ധിച്ച് ഫെയറുകൾ സംഘടിപ്പിക്കും. സഞ്ചരിക്കുന്ന ഓണച്ചന്തകളും ഒരുക്കിയിട്ടുണ്ട്.

ബ്രാൻഡഡ് എഫ്എംസിജി ഉൽപന്നങ്ങളുടെ ഒരു നിര തന്നെ ഇത്തവണ സപ്ലൈകോ ഒരുക്കിയിട്ടുണ്ട്. 250ൽ അധികം ബ്രാൻഡഡ് നിത്യോപയോഗ  സാധനങ്ങൾക്ക്  ഓഫറുകളും, വിലക്കുറവും നൽകുന്നുണ്ട്. 

രാജ്യത്താകെ അവശ്യസാധനങ്ങളുടെ വില കുതിച്ചുയരുന്ന ഈ കാലഘട്ടത്തില്‍ ഉപഭോക്തൃ സംസ്ഥാനമായ കേരളത്തില്‍ സ്വാഭാവികമായി വിലക്കറ്റം ഉണ്ടാകേണ്ടതാണെങ്കിലും  മാതൃകാപരമായ വിപണി ഇടപെടലിലൂടെ വിലക്കയറ്റം പിടിച്ചു നിര്‍ത്താനായതായി മുഖ്യമന്ത്രി പറഞ്ഞു. പൊതുവിപണിയില്‍ വളരെ ശക്തമായി ഇടപെടലാണ് സര്‍ക്കാര്‍ നടത്തുന്നത്. വെളിച്ചെണ്ണയുടെ വിലക്കയറ്റത്തെ നിയന്ത്രിക്കാന്‍ ഫലപ്രദമായ ഇടപെടല്‍ നടത്താനായി.  വെളിച്ചെണ്ണ കിലോയ്ക്ക്  അഞ്ഞൂറു രൂപയോളം ആയ ഘട്ടത്തില്‍ ശബരി വെളിച്ചെണ്ണ സബ്ഡിയോടെ 354 രൂപയ്ക്കും സബ്ഡി ഇല്ലാതെ 489 രൂപയ്ക്കും നല്‍കുകയാണ്.  വില ഇനിയും കുറയ്ക്കാനുള്ള ഇടപെടല്‍ നടത്തുമെന്നും മുഖ്യമന്ത്രി പറഞ്ഞു.