എം.കെ.മുനീർ എം.എൽ.എയുടെ ഗ്രാമയാത്ര: നരിക്കുനിയിൽ പ്രൗഢമായ തുടക്കം

നരിക്കുനി : കൊടുവള്ളി നിയോജക മണ്ഡലത്തിലെ ജനങ്ങളുടെ പ്രശ്നങ്ങൾക്ക് നേരിട്ട് പരിഹാരം നിർദ്ദേശിക്കുന്നതിനനായി  എം.എൽ.എ. ഡോ.എം.കെ. മുനീർ നടത്തുന്ന 'ഗ്രാമയാത്ര'യ്ക്ക് നരിക്കുനിയിൽ പ്രൗഢമായ തുടക്കം. പഞ്ചായത്തിലെ ജനങ്ങളുമായി നേരിട്ട് സംവദിക്കുന്നതിനായി ഗ്രാമയാത്രയുടെ ഭാഗമായി സംഘടിപ്പിച്ച 'ജനസഭ'യിൽ നൂറോളം പരാതികളും ആക്ഷേപങ്ങളും എം.എൽ.എ.യും ഉദ്യോഗസ്ഥരും നേരിട്ട് കേട്ടു.

'ജനസഭ'യിൽ ഉദ്യോഗസ്ഥരുടെ സാന്നിധ്യത്തിൽ 

പൊതുജനങ്ങളുടെ പരാതികൾ പരിഗണിച്ച്, അപ്പോൾത്തന്നെ പരിഹാരം നിർദേശിക്കുന്നതിനുള്ള സംവിധാനമാണ് ഒരുക്കിയിട്ടുള്ളത്. വിവിധ സർക്കാർ ഓഫീസുകളുമായി ബന്ധപ്പെട്ട തീർപ്പാക്കാത്ത പ്രശ്നങ്ങൾ, മണ്ഡലത്തിലെ വികസന വിഷയങ്ങൾ, സംസ്ഥാന സർക്കാരിന്റെ ശ്രദ്ധയിൽപ്പെടുത്തേണ്ട വിഷയങ്ങൾ തുടങ്ങിയ  പരാതികൾ ജനങ്ങൾക്ക് ഗ്രാമയാത്രയിൽ സമർപ്പിക്കാൻ അവസരമുണ്ടായിരുന്നു. പരാതിയുടെ ഉള്ളടക്കം അനുസരിച്ച്, ബന്ധപ്പെട്ട ഉദ്യോഗസ്ഥരുടെ സാന്നിധ്യത്തിൽ 27 പരാതികൾക്ക്  പരിഹാരം  കണ്ടെത്തി. പന്നിക്കോട്ടൂർ ഗവ. ആയുർവേദ  ആശുപത്രിയുടെ രണ്ടാംഘട്ട നിർമ്മാണത്തിന് ഒരു കോടി രൂപ നാഷണൽ ആയുഷ് മിഷനിൽ നിന്നും ഈ വർഷം  ലഭ്യമാക്കുമെന്നും, നിർമ്മാണത്തിൽ ഇരിക്കുന്ന കെട്ടിടത്തിൻ്റെ കവാടത്തിലുള്ള കുഴൽ കിണർ നീക്കം ചെയ്യുന്നതിനും ഭൂഗർഭ ജലവകുപ്പിന് ജനസഭയിൽ നിർദ്ദേശം നൽകിയിട്ടുണ്ടെന്നും  സഭയിൽ എം.എൽ.എ അറിയിച്ചു. നരിക്കുനി ഫയർ സ്റ്റേഷൻ കെട്ടിടത്തിന് ഒന്നാം ഘട്ടത്തിന് രണ്ടര കോടിയുടെ സർക്കാർ അനുമതി ലഭ്യമായതായും തുടർനടപടി സ്വീകരിച്ചു വരുന്നതായും ബൈപ്പാസ് ഒന്നാം ഘട്ടത്തിന്റെ നിർമ്മാണത്തിന്റെ ഫയൽ സർക്കാരിൻ്റെ പരിഗണനയിൽ ആണെന്നും ചോദ്യങ്ങൾക്ക് മറുപടിയായി എം.എൽ.എ. അറിയിച്ചു. നരിക്കുനിയിലെ ബിവറേജസ് ഔട്ട്ലെറ്റ് പരിസരവാസികൾക്ക് ഉണ്ടാകുന്ന പ്രയാസങ്ങൾ കണക്കിലെടുത്ത് നടപടികളുണ്ടാകുകന്നതിന് വിഷയം നിയമസഭയിൽ ഉന്നയിക്കുമെന്നും  എം.എൽ.എ ജനസഭയിൽ അറിയിച്ചു.

മണ്ഡലത്തിലെ അപേക്ഷ നൽകിയ 

ഭിന്നശേഷിക്കാർക്ക് യു.ഡി.ഐ.ഡി കാർഡ് വിതരണം

ഗ്രാമയാത്രയുടെ ഭാഗമായി നടന്നു. മണ്ഡലത്തിലെ മുഴുവൻ ഭിന്നശേഷിക്കാർക്കും യു.ഡി.ഐ.ഡി കാർഡ് വിതരണം ചെയ്യുന്നതിന്റെ ഉദ്ഘാടനവും ഡോ. എം.കെ. മുനീർ നിർവഹിച്ചു. ഇതോടെ, മുഴുവൻ ഭിന്നശേഷിക്കാർക്കും യു.ഡി.ഐ.ഡി കാർഡ് ലഭ്യമായ കേരളത്തിലെ ആദ്യത്തെ മണ്ഡലമായി കൊടുവള്ളി മാറിയതായി എം.എൽ.എ. അറിയിച്ചു.

മണ്ഡലത്തിലെ മറ്റ് പഞ്ചായത്തുകളിലും മുനിസിപ്പാലിറ്റിയിലും വരും ദിവസങ്ങളിൽ ഗ്രാമയാത്ര തുടരും. ചടങ്ങിൽ രാഷ്ട്രപതിയുടെ പോലീസ് മെഡലിന് അർഹയായ സജീഷ.കെ,  പഞ്ചാബിൽ നടന്ന സ്പെഷ്യൽ ഒളിമ്പിക്സിൽ സ്വർണ്ണ മെഡൽ ജേതാവായ ദിൽ ന .ശശികുമാർ എന്നിവരെ ചടങ്ങിൽ  അനുമോദിച്ചു.  ജനസഭയിലേക്കുള്ള പരാതികൾ എം.എൽ.എ. ഓഫീസ്, ബന്ധപ്പെട്ട  പഞ്ചായത്ത്, മുൻസിപ്പാലിറ്റി ഓഫീസുകളിൽ   സ്വീകരിച്ചു വരുന്നുണ്ട്. കൂടാതെ, ഗ്രാമയാത്ര നടക്കുന്ന ദിവസം പൊതുജനങ്ങൾക്ക് നേരിട്ട് പരാതികൾ നൽകാനുള്ള അവസരവും ഉണ്ടായിരിക്കും.

നരിക്കുനിയിൽ നടന്ന മണ്ഡലം തല ഉദ്ഘാടന ചടങ്ങിൽ ഗ്രാമപഞ്ചായത്ത് പ്രസിഡണ്ട് ടി.കെ സുനിൽകുമാർ അധ്യക്ഷനായി. കൊടുവള്ളി  ബ്ലോക്ക് പഞ്ചായത്ത് പ്രസിഡൻ്റ് കെ.എം അഷ്റഫ്, കോഴിക്കോട് സി.ആർ.സി ഡയറക്ടർ റോഷൻ ബിജിലി, മുൻ എം.എൽ.എ വി.എം ഉമ്മർ,  എം.എ റസാക്ക് മാസ്റ്റർ, സി.ടി ഭരതൻ, എ അരവിന്ദൻ, കെ.കെ.എ ഖാദർ, വി.ഇല്യാസ്, എപി മജീദ്,  നാസർ എസ്റ്റേറ്റ് മുക്ക്, റംസീന  നരിക്കുനി, ഐ.പി .രാജേഷ്, കെ.വിജയകുമാർ, വാസുദേവൻ നമ്പൂതിരി, കെ.സി.ഖാദർ, പഞ്ചായത്ത് വൈസ് പ്രസിഡണ്ട് സി.പി.ലൈല സ്വാഗതവും  പഞ്ചായത്ത് സെക്രട്ടറി ദേവദാസ് നന്ദിയും പറഞ്ഞു.