മലയാളി നർത്തകി ഗൗരി നന്ദ അപകടത്തിൽ മരിച്ചു

ചെന്നൈ : മലയാളി യുവ നർത്തകി തമിഴ്നാട്  കടലൂരിൽ കാർ അപകടത്തിൽ മരിച്ചു. ചിദംബരം അമ്മപെട്ടൈ ബൈപാസിൽ ഉണ്ടായ വാഹനാപകടത്തിലാണു മലയാളി നർത്തകി എറണാകുളം സ്വദേശിനിയായ ഗൗരിനന്ദ (20) മരിച്ചത്. ഒപ്പം സഞ്ചരിച്ചവർക്ക് പരുക്കേറ്റു. ഇതിൽ ഒരാളുടെ നില ഗുരുതരമാണ്. പുതുച്ചേരിയിലേയ്ക്കുള്ള യാത്രയ്ക്കിടെ ശനിയാഴ്ച വൈകിട്ടായിരുന്നു അപകടം. ഇവർ സഞ്ചരിച്ചിരുന്ന കാർ നിയന്ത്രണം നഷ്ടപ്പെട്ട് റോഡരികിലെ കുഴിയിലേയ്ക്ക് മറിയുകയായിരുന്നു.

എറണാകുളം സ്വദേശികളായ ഫ്രെഡി (29), അഭിരാമി (20), തൃശൂർ സ്വദേശി വൈശാൽ (27), സുകില (20), അനാമിക (20) എന്നിവർക്കാണ് പരുക്കേറ്റത്. ഇവർ കടലൂർ ഗവ. മെഡിക്കൽ കോളജ് ആശുപത്രിയില്‍ ചികിത്സയിലാണ്.  ആശുപത്രിയിലേക്കു കൊണ്ടുപോകുന്ന വഴിയാണ് ഗൗരിനന്ദ മരിച്ചത്. സംഭവത്തിൽ അണ്ണാമലൈനഗർ പൊലീസ് അന്വേഷണം ആരംഭിച്ചു.