ഓട ശുചീകരണം: 3 തൊഴിലാളികൾക്ക് ദാരുണാന്ത്യം

കട്ടപ്പന : അഴുക്കുചാലും വൃത്തിയാക്കുന്ന ജോലിക്കിടെ മൂന്നു തൊഴിലാളികൾക്ക് ദാരുണാന്ത്യം. കട്ടപ്പന പാറക്കടവ് ഭാഗത്ത് ചൊവ്വാഴ്ച്ച രാത്രി പത്തരയോടെയായിരുന്നു ദുരന്തം. ഓടയിൽ ഇറങ്ങിയ തൊഴിലാളികൾ കുടുങ്ങി പോവുകയായിരുന്നു. 

ഓടയിൽ ഇറങ്ങിയ തമിഴ്‌നാട് കമ്പം സ്വദേശി ജയറാം, ഗൂഡല്ലൂര്‍ സ്വദേശികളായ സുന്ദരപാണ്ഡ്യന്‍, മൈക്കിള്‍ എന്നിവരാണ് മരിച്ചത്.

 അഴുക്കുചാല്‍ വൃത്തിയാക്കുന്നതിനായി ആദ്യം ഇറങ്ങിയ ആള്‍ കുഴഞ്ഞുവീണതോടെ ഇയാളെ രക്ഷിക്കുന്നതിനായി മറ്റ് രണ്ടുപേരും ഇറങ്ങുകയായിരുന്നു. ഇതോടെ 3 പേരും ഓടയ്ക്കകത്ത് കുടുങ്ങി. തുടർന്ന് സ്ഥലത്തുണ്ടായിരുന്നവർ പൊലീസിനേയും അഗ്നിശമന സേനയെയെയും വിവരം അറിയിക്കുകയായിരുന്നു. അഗ്നിശമന സേന ഉടൻ സ്ഥലത്തെത്തി രക്ഷാപ്രവര്‍ത്തനം ആരംഭിച്ചിരുന്നു.

രാത്രിയോടെ തന്നെ മൂവരെയും പുറത്തെത്തിച്ച് കട്ടപ്പന താലൂക്ക് ആശുപത്രിയില്‍ പ്രവേശിപ്പിച്ചിരുന്നു. എന്നാല്‍ രാത്രി 12.30ഓടെ മൂവരുടെയും മരണം സ്ഥിരീകരിച്ചു.