എടവണ്ണയില്‍ വൻ ആയുധശേഖരം പിടികൂടി

മലപ്പുറം : എടവണ്ണയിലെ വീട്ടിൽ നടത്തിയ പരിശോധനയിൽ 20 എയർ ഗണ്ണുകളും മൂന്ന് റൈഫിളുകളും ഉൾപ്പെടെയുള്ള ആയുധശേഖരം പിടിച്ചെടുത്ത്‌ പൊലീസ്. 200ലധികം വെടിയുണ്ടകളും 40 പെല്ലറ്റ് ബോക്സും കണ്ടെത്തി. വീട്ടുടമസ്ഥൻ ഉണ്ണിക്കമ്മദിനെ (67)  അറസ്റ്റ് ചെയ്തു. ആയുധങ്ങൾ അനധികൃതമായി സൂക്ഷിച്ച് വിൽപ്പന നടത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന.

വീടിന്റെ മുകൾ ഭാഗത്ത് നടത്തിയ പരിശോധനയിൽ ഒരു റൈഫിളും 40 തിരകളും ഒരു എയർഗണ്ണും കണ്ടെത്തിയിരുന്നു. വീടിന് താഴെ ഷട്ടറിട്ട ഭാഗത്ത് നടത്തിയ പരിശോധനയിലാണ് വൻ ആയുധ ശേഖരം കണ്ടെത്തിയത്. ഇവ എവിടെ നിന്ന് എത്തിച്ചുവെന്ന കാര്യത്തിൽ കൂടുതൽ വ്യക്തത തേടുകയാണ് പൊലീസ്. 

വെടിയുണ്ടകളുമായി സഹോദരങ്ങളടക്കം നാല് പേരെ പാലക്കാട് വെച്ച്‌ അറസ്റ്റ് ചെയ്തിരുന്നു. കല്‍പ്പാത്തിയില്‍  വാഹന പരിശോധനയ്ക്കിടെയാണ് ഇവർ അറസ്റ്റിലായത്. മൃഗവേട്ടക്ക് ഉപയോഗിക്കുന്ന ആയുധങ്ങളാണ് ഇതെന്നാണ് ഇവർ പൊലീസിനോട് പറഞ്ഞത്. എന്നാല്‍ ആയുധങ്ങള്‍ എവിടെ നിന്നാണ് വാങ്ങിയതെന്ന അന്വേഷണമാണ് മലപ്പുറം എടവണ്ണയിലേക്ക് എത്തിയത്. രണ്ട് തോക്കുകള്‍ കൈവശംവെക്കാനുള്ള ലൈസൻസെ വീട്ടുടമയായ ഉണ്ണിക്കമ്മദിനുണ്ടായിരുന്നുള്ളൂ. എന്നാല്‍ അതിനേക്കാള്‍ കൂടുതല്‍ തോക്കുകളും തിരകളും ഇദ്ദേഹത്തിന്റെ കൈവശമുണ്ടായിരുന്നുവെന്നാണ് പൊലീസ് പറയുന്നത്. പല തരത്തിലുള്ള തോക്കുകളും മറ്റും കൈവശം വെക്കുന്നതും വില്‍ക്കുന്നതും ഹോബിയാണെന്ന് ഇയാള്‍ പറയുന്നു. അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.