തീരാനോവായി കുരുന്നുകൾ; ഓട്ടോ മറിഞ്ഞ് മരിച്ച വിദ്യാർഥികൾക്ക് വിട

പത്തനംതിട്ട : തൂമ്പാക്കുളത്ത് ഓട്ടോറിക്ഷ മറിഞ്ഞ് മരിച്ച കുരുന്നുകൾക്ക് നാടിന്റെ യാത്രാമൊഴി. പത്തനംതിട്ട കരുമാൻതോട് ശ്രീനാരായണ സ്‌കൂളിലെ മൂന്നാം ക്ലാസ് വിദ്യാർഥി ആദ്യലക്ഷ്‌മി (7), എൽകെജി വിദ്യാർഥി യദു കൃഷ്‌ണൻ (4) എന്നിവരാണ് ദാരുണമായി മരിച്ചത്. ആയിരങ്ങളുടെ യാത്രാമൊഴികൾ ഏറ്റുവാങ്ങി കുരുന്നുകൾ യാത്രയായി. സ്കൂളിലെ പൊതുദർശനത്തിനു ശേഷമായിരുന്നു സംസ്‌കാരം. ഇന്നലെ വൈകിട്ട് വിദ്യാർത്ഥികളുമായി പോയ ഓട്ടോറിക്ഷയാണ് 50 അടി താഴ്ചയുള്ള തോട്ടിലേക്ക് നിയന്ത്രണം വിട്ട് മറിഞ്ഞത്. മരിച്ച ആദ്യലക്ഷ്‌മി ഉൾപ്പെടെ ഓട്ടോയിൽ ഉണ്ടായിരുന്ന കുട്ടികളെ ആശുപത്രിയിൽ എത്തിച്ചെങ്കിലും യദുകൃഷ്ണനെ കണ്ടെത്തിയിരുന്നില്ല. മണിക്കൂറുകൾ നീണ്ട തിരച്ചിലിനൊടുവിൽ രാത്രി വൈകി പാറക്കെട്ടിന് ഇടയിൽ നിന്നാണു മൃതദേഹം കിട്ടിയത്. റോഡിൽ പാമ്പിനെ കണ്ട് ഓട്ടോറിക്ഷ വെട്ടിച്ചപ്പോഴാണ് അപകടം ഉണ്ടായതെന്ന് ഡ്രൈവർ രാജേഷ് പൊലീസിനു മൊഴി നൽകി. പരുക്കേറ്റ മറ്റു നാല് കുട്ടികളും ഡ്രൈവറും ചികിത്സയിലാണ്.