ഇർഷാദ് അലി കഠിനാധ്വാനത്തിന്റെ മാതൃക

ജീവിതത്തിന്റെ വറുതിയോടും പരിമിതികളോടും പൊരുതി വിജയത്തിന്റെ കൊടുമുടി കീഴടക്കിയ ചരിത്രങ്ങൾ മനുഷ്യർക്ക് എന്നും പ്രചോദനമാണ്. പ്രതിസന്ധികൾക്ക് മുന്നിൽ പതറാതെ ലക്ഷ്യബോധത്തോടെ മുന്നേറിയാൽ അസാധ്യമായി ഒന്നുമില്ലെന്ന് തെളിയിക്കുകയാണ് മലപ്പുറം നിലമ്പൂർ കാളികാവ് സ്വദേശിയായ ഇർഷാദ് അലി. കെട്ടിട നിർമാണ മേഖലയിലെ കഠിനമായ കോൺക്രീറ്റ് വാർപ്പ് പണിയുടെ വിയർപ്പിൽനിന്ന്, സ്വപ്നം കണ്ട വെള്ളക്കുപ്പായവും സ്റ്റെതസ്‌കോപ്പും അണിഞ്ഞ് കോഴിക്കോട് സർക്കാർ മെഡിക്കൽ കോളേജിന്റെ തിരുമുറ്റത്തേക്ക് എംബിബിഎസ് പ്രവേശനവുമായി ഇർഷാദ് അലി നടന്നു കയറുമ്പോൾ അത് കഠിനാധ്വാനത്തിന്റെ മാത്രം ഫലമാണ്. ദീർഘനാളത്തെ ഇടവേളകൾക്കും പ്രതിസന്ധികൾക്കും ശേഷം നീറ്റ് സ്‌പെഷ്യൽ റിസർവേഷൻ കാറ്റഗറിയിൽ രണ്ടാം റാങ്ക് സ്വന്തമാക്കിയാണ് ഇർഷാദ് അലി കോഴിക്കോട് മെഡിക്കൽ കോളേജിൽ പ്രവേശനം ഉറപ്പാക്കിയത്.

കാളികാവ് പള്ളിശ്ശേരിയിലെ കരിപ്പായി അബ്ദുൽ അസീസിന്റെയും മൈമൂനയുടെയും മകനായ ഇർഷാദ് അലിക്ക് പഠനവഴികൾ ഒരിക്കലും എളുപ്പമുള്ളതായിരുന്നില്ല. മകനെ ഡോക്ടറാക്കണമെന്നത് പിതാവ് അബ്ദുൽ അസീസിന്റെ വലിയ സ്വപ്നമായിരുന്നു. എന്നാൽ, ആ ആഗ്രഹം പങ്കുവച്ചപ്പോൾ കൂടെയുള്ള പലരും പരിഹസിച്ചു. ഒരു സാധാരണ കുടുംബത്തിന് താങ്ങാൻ കഴിയുന്നതല്ല ഇത്തരം പഠനച്ചെലവുകൾ എന്നതായിരുന്നു പലരുടെയും ഉപദേശം. തന്നെ പരിഹസിച്ചവർക്ക് മുൻപിൽ മറുപടി നൽകേണ്ടത് വിജയത്തിലൂടെയാണെന്ന് ഉറപ്പിച്ച പിതാവിന്റെ പിന്തുണയും ഇർഷാദിന് കരുത്തായി.

പഠനാവശ്യങ്ങൾക്കായി പിതാവ് പലരോടും കടം വാങ്ങി ബുദ്ധിമുട്ടുന്നത് കണ്ടതോടെയാണ് സ്വന്തം അധ്വാനം കൊണ്ട് പഠനം പൂർത്തിയാക്കാൻ ഇർഷാദ് തീരുമാനിക്കുന്നത്. തുടർന്ന് കിട്ടുന്ന ഒഴിവുസമയങ്ങളിലെല്ലാം കൂലിപ്പണിക്ക് ഇറങ്ങി. കെട്ടിട നിർമാണം, റോഡ് പണി, സിമന്റ് കൂട്ടു നിർമാണം, പ്ലാസ്റ്റിക് റീസൈക്ലിങ് യൂണിറ്റുകളിലെ കഠിനമായ ജോലി തുടങ്ങി ഒരു തൊഴിലിനെയും അദ്ദേഹം മടിച്ചില്ല. പണിസ്ഥലങ്ങളിൽനിന്ന് ലഭിക്കുന്ന ചെറിയ വരുമാനം സ്വരൂപിച്ചാണ് പുസ്തകങ്ങൾ വാങ്ങിയതും കോളേജ് ഫീസ് അടച്ചതും.

ഒരു തൊഴിലിനെയും ചെറുതായി കാണാതെ ജീവിച്ച അനുഭവങ്ങൾ ഇർഷാദ് തന്നെയാണ് സോഷ്യൽ മീഡിയ കുറിപ്പിലൂടെ പങ്കുവച്ചത്. ജീവിതത്തിൽ പലവിധ ജോലികൾ ചെയ്തിട്ടുണ്ടെങ്കിലും കോൺക്രീറ്റ് വാർപ്പ് പണിക്ക് പോയിരുന്ന നാളുകളെ അദ്ദേഹം ഏറെ വൈകാരികമായാണ് ഓർത്തെടുക്കുന്നത്. നിർമാണ രംഗത്ത് ഏറ്റവും അധ്വാനമേറിയ ഒന്നാണ് വാർപ്പ് പണി. കഠിനമായി പണിയെടുത്ത് തീർക്കുമ്പോൾ സാധാരണ ദിവസക്കൂലിക്ക് പുറമെ ഒരു പൊതി ബിരിയാണി കിട്ടും. ഒപ്പം അധികമായി നൂറ് രൂപയും നൽകും. ആ ചെറിയ സന്തോഷം പോലും അന്നത്തെ ദിവസത്തെ ഏറ്റവും പ്രിയപ്പെട്ടതാക്കി മാറ്റാൻ പര്യാപ്തമായിരുന്നുവെന്ന് അദ്ദേഹം കുറിക്കുന്നു.

വിയർപ്പിൽ കുതിർന്ന ഷർട്ടും ധരിച്ച് ഒരു സാധാരണ നാട്ടിൻപുറത്തെ കൂലിപ്പണിക്കാരനായി നിൽക്കുമ്പോൾ അനുഭവപ്പെടുന്ന അധ്വാനത്തിന്റെ സംതൃപ്തി പൂർണമായി അനുഭവിച്ചറിഞ്ഞിട്ടുണ്ട്. ജോലി കഴിഞ്ഞ് കൂലിയും ബിരിയാണിയുമായി ആ വിയർപ്പോടെ തന്നെ ബൈക്കിൽ വീട്ടിലേക്ക് തിരികെ പോരുമ്പോൾ വീശിയടിക്കുന്ന കാറ്റിന് വല്ലാത്തൊരു കുളിർമയുണ്ടായിരുന്നു. മനസ്സുനിറഞ്ഞ സന്തോഷത്തോടെയുള്ള ആ മടക്കയാത്രകളിലായിരുന്നു മനസ്സിന്റെ ഒരു കോണിൽ ഒരു ആഗ്രഹം മുളപൊട്ടിയത്. വസ്ത്രങ്ങൾ മാറി, തിരക്കുപിടിച്ച ഒരു ആശുപത്രി വരാന്തയിലൂടെ വെള്ളക്കോട്ടും സ്റ്റെതസ്‌കോപ്പും ധരിച്ച് നടന്നുനീങ്ങുന്ന സ്വന്തം ചിത്രം മനസ്സിൽ സങ്കൽപ്പിക്കാറുണ്ടായിരുന്നു. ആ ഒരു സ്വപ്‌നമാണ് ഇപ്പോൾ കോഴിക്കോട് മെഡിക്കൽ കോളേജ് പ്രവേശനത്തിലൂടെ യാഥാർഥ്യമായിരിക്കുന്നത്.

കണ്ണൂർ വിഷ്ണു ആയുർവേദ മെഡിക്കൽ കോളേജിലായിരുന്നു ബിഎഎംഎസ് പഠനം. പഠനകാലയളവിലുടനീളം സഹപാഠികൾക്കൊപ്പം ക്ലാസ് മുറികളിലും അവധി ദിവസങ്ങളിൽ നിർമാണ സൈറ്റുകളിലും ഇർഷാദിന്റെ സാന്നിധ്യമുണ്ടായിരുന്നു. കഠിനമായ അധ്വാനത്തിനൊടുവിൽ പരീക്ഷകളിൽ മികച്ച വിജയം സ്വന്തമാക്കി ബിഎഎംഎസ് ബിരുദം പൂർത്തിയാക്കിയതോടെ കുടുംബത്തിന്റെ സ്വപ്നം സാക്ഷാത്കരിക്കപ്പെട്ടു.

ആയുർവേദ പഠനം പൂർത്തിയാക്കിയെങ്കിലും അവിടം കൊണ്ടൊന്നും പഠനം അവസാനിപ്പിക്കാനോ ആഗ്രഹങ്ങൾ മാറ്റിവെക്കാനോ ഇർഷാദ് തയാറായിരുന്നില്ല. എന്നാൽ, കരിയറിലെ പലവിധ തിരിച്ചടികളും സാമ്പത്തിക പ്രതിസന്ധികളും പലപ്പോഴും തളർത്തി. തുടർന്ന് പന്ത്രണ്ട് വർഷത്തോളം നീണ്ട ഒരു ഇടവേള പഠന ജീവിതത്തിൽ കടന്നുവന്നു. എന്നിട്ടും മനസ്സിൽ സൂക്ഷിച്ച എംബിബിഎസ് എന്ന ലക്ഷ്യത്തിൽനിന്ന് അവൻ പിന്മാറിയില്ല.

തോൽവികളെക്കുറിച്ചുള്ള ഭയം മനസ്സിനെ ബാധിക്കാതിരുന്നതാണ് തന്നെ വീണ്ടും നീറ്റ് പരീക്ഷയിലേക്ക് എത്തിച്ചതെന്ന് ഇർഷാദ് വ്യക്തമാക്കുന്നു. കഠിനമായ പരിശീലനത്തിലൂടെയും പരീക്ഷാ തയ്യാറെടുപ്പുകളിലൂടെയും മുന്നേറിയ യുവാവ് ഒടുവിൽ പ്രത്യേക സംവരണ വിഭാഗത്തിൽ സംസ്ഥാന തലത്തിൽ രണ്ടാം റാങ്ക് തന്നെ സ്വന്തമാക്കി.

കോഴിക്കോട് മെഡിക്കൽ കോളേജിന് മുന്നിൽ ഉമ്മയ്ക്കും സഹോദരങ്ങൾക്കും പ്രിയപ്പെട്ടവർക്കുമൊപ്പം നിൽക്കുന്ന ചിത്രം പങ്കുവെച്ചുകൊണ്ടാണ് ഇർഷാദ് അലി തന്റെ സന്തോഷം പ്രകടിപ്പിച്ചത്. തന്റെ കഠിനമായ യാത്രയിൽ താങ്ങായി ഒപ്പം നിന്ന ഉപ്പയ്ക്കും ഉമ്മയ്ക്കും സഹോദരങ്ങൾക്കും സുഹൃത്തുക്കൾക്കും അദ്ദേഹം നന്ദി അറിയിച്ചു.