ഓർമകളുമായി നടൻ കൃഷ്ണൻകുട്ടി നായരുടെ കുടുംബം

"പച്ചമത്തി"വായിലേക്ക് കുത്തിയിറക്കുന്ന രംഗം പോലും ശെരിക്കും പച്ചയ്ക്ക് തന്നെയാണ് അദ്ദേഹം ചെയ്തതെന്ന് മക്കൾ ഓർക്കുന്നു.... കഥാപാത്രത്തെ അവതരിപ്പിക്കുന്നതിനായി അദ്ദേഹം ഏറെ ബുദ്ധിമുട്ടുകളും ഏറ്റെടുത്തിരുന്നു.

കൃഷ്ണൻകുട്ടി നായരുടെ അഭിനയജീവിതത്തിൽ അദ്ദേഹത്തിന് ഏറെ പ്രതീക്ഷയുണ്ടായിരുന്ന ചിത്രങ്ങളിലൊന്നായിരുന്നു ‘ഒരേ തൂവൽപക്ഷികൾ.

 ആ ചിത്രത്തിലെ പ്രകടനത്തിന് തനിക്ക് അവാർഡ് ലഭിക്കുമെന്ന് അദ്ദേഹം കരുതിയിരുന്നുവെന്ന് മകൻ ഓർക്കുന്നു.

 മദ്യപിക്കാതെയാണ് ചിത്രത്തിലെ മദ്യപാന രംഗങ്ങൾ അവതരിപ്പിച്ചതെന്നും കുടുംബം പറയുന്നു. മാത്രമല്ല, 

കഥാപാത്രത്തിനായി തലമുടിയും മീശയും പകുതി മാത്രം വടിച്ചുമാറ്റുകയും ചെയ്തിരുന്നു. 

അതെല്ലാം മേക്കപ്പിന്റെയോ കൃത്രിമത്വത്തിന്റെയോ സഹായമില്ലാതെ കഥാപാത്രത്തിന്റെ ഭാഗമായി തന്നെ അദ്ദേഹം ചെയ്ത കാര്യങ്ങളായിരുന്നു.

 തന്റെ അഭിനയത്തിന് അവാർഡ് കിട്ടുമെന്ന് കൃഷ്ണൻകുട്ടി നായർ കുടുംബത്തോട് പറഞ്ഞിട്ടുള്ളത് ഈ സിനിമയെക്കുറിച്ച് മാത്രമായിരുന്നുവെന്നും മകൻ പറയുന്നു.

എന്നാൽ പുരസ്കാര പ്രഖ്യാപനം വന്നപ്പോൾ അദ്ദേഹത്തിന്റെ പേര് ഉണ്ടായിരുന്നില്ല. ആ അവഗണന അദ്ദേഹത്തെ ഏറെ വിഷമിപ്പിച്ചു.

 പിന്നീട് ഒരു പരിപാടിയിൽ അദ്ദേഹം പറഞ്ഞതായി കുടുംബം ഓർക്കുന്ന വാക്കുകൾ ഇന്നും ഏറെ വേദനയോടെയാണ് മക്കൾ പറയുന്നത്.

 അവാർഡ് വേണ്ടെന്നും പ്രേക്ഷകരുടെ സ്നേഹം മാത്രം മതിയെന്നുമായിരുന്നു അദ്ദേഹത്തിന്റെ നിലപാട്.

തിരുവനന്തപുരത്തെ ശാസ്തമംഗലത്ത് ജനിച്ച അദ്ദേഹം പഠനത്തിന് ശേഷം തലശ്ശേരി ബ്രണ്ണൻ കോളേജിൽ ലൈബ്രേറിയനായാണ് ഔദ്യോഗിക ജീവിതം ആരംഭിച്ചത്. 

എന്നാൽ നാടകത്തോടുള്ള അടുപ്പം അദ്ദേഹത്തെ മറ്റൊരു ലോകത്തേക്ക് എത്തിച്ചു. കാവാലം നാരായണപ്പണിക്കരുടെ നാടകങ്ങളിലൂടെയാണ് കൃഷ്ണൻകുട്ടി നായർ അഭിനയരംഗത്തേക്ക് കടന്നുവരുന്നത്.

പിന്നീട് നിരവധി നാടകസമിതികളുടെ ഭാഗമായി പ്രവർത്തിച്ച അദ്ദേഹം വേദിയിൽ നിന്ന് പതിയെ സിനിമയിലേക്കും തന്റെ സാന്നിധ്യം വ്യാപിപ്പിച്ചു.

1979-ൽ പി. പത്മരാജൻ സംവിധാനം ചെയ്ത ‘പെരുവഴിയമ്പലം’ എന്ന ചിത്രത്തിലൂടെയായിരുന്നു കൃഷ്ണൻകുട്ടി നായരുടെ സിനിമാ അരങ്ങേറ്റം.

 തുടർന്ന് മലയാള സിനിമയിലെ നിരവധി പ്രമുഖ സംവിധായകരുടെ ചിത്രങ്ങളിൽ ചെറുതും വലുതുമായ കഥാപാത്രങ്ങളെ അദ്ദേഹം അവതരിപ്പിച്ചു. 

അടൂർ ഗോപാലകൃഷ്ണൻ, ജി. അരവിന്ദൻ, പത്മരാജൻ, സത്യൻ അന്തിക്കാട്, കമൽ തുടങ്ങിയ പ്രഗത്ഭ സംവിധായകരുടെ സിനിമകളിൽ കൃഷ്ണൻകുട്ടി നായരുടെ സാന്നിധ്യമുണ്ടായിരുന്നു.

 എന്നാൽ അദ്ദേഹത്തിന്റെ അഭിനയജീവിതത്തിൽ വലിയൊരു വഴിത്തിരിവായി മാറിയത് 1988-ൽ സത്യൻ അന്തിക്കാട് സംവിധാനം ചെയ്ത ‘പൊന്മുട്ടയിടുന്ന താറാവ്’ എന്ന ചിത്രത്തിലെ ‘തട്ടാൻ ഗോപാലൻ’ എന്ന കഥാപാത്രമായിരുന്നു.

കിടപ്പിലായിരുന്ന പഴയ തട്ടാനായ ഗോപാലനെ കൃഷ്ണൻകുട്ടി നായർ അവതരിപ്പിച്ച രീതി ഇന്നും മലയാളി പ്രേക്ഷകരുടെ ഓർമ്മയിൽ ചിരിയുണർത്തുന്ന ഒന്നാണ്.

 അതിന് പിന്നാലെ ‘കാക്കോത്തിക്കാവിലെ അപ്പൂപ്പൻ താടികൾ’ എന്ന ചിത്രത്തിലെ കാലൻ മത്തായി, ‘മഴവിൽക്കാവടി’യിലെ കാളിമുത്തു, ‘കോട്ടയം കുഞ്ഞച്ചൻ’ എന്ന ചിത്രത്തിലെ പച്ചകുളം വാസു തുടങ്ങി നിരവധി കഥാപാത്രങ്ങൾ അദ്ദേഹത്തിന്റെ അഭിനയമികവിന്റെ അടയാളങ്ങളായി മാറി.

‘കടിഞ്ഞൂൽ കല്യാണം’, ‘വരവേൽപ്പ്’, ‘ഒരിടത്തൊരു ഫയൽവാൻ’, ‘അവിട്ടം തിരുനാൾ ആരോഗ്യശ്രീമാൻ’, ‘മാന്ത്രികചെപ്പ്’, ‘കാവടിയാട്ടം’, ‘ചെപ്പ് കിലുക്കണ ചങ്ങാതി’, ‘ചാഞ്ചാട്ടം’, ‘ഉള്ളടക്കം’, ‘മൂക്കില്ലാ രാജ്യത്ത്’ തുടങ്ങി എൺപതോളം ചിത്രങ്ങളിൽ അദ്ദേഹം അഭിനയിച്ചു.

സ്ക്രീനിൽ പലപ്പോഴും നർമ്മം പകരുന്ന കഥാപാത്രങ്ങളിലായിരുന്നു കൃഷ്ണൻകുട്ടി നായരെ പ്രേക്ഷകർ കണ്ടിരുന്നതെങ്കിലും യഥാർഥ ജീവിതത്തിലെ അദ്ദേഹം തികച്ചും വ്യത്യസ്തനായിരുന്നുവെന്നാണ് കുടുംബം പറയുന്നത്.

 സിനിമയിൽ കാണുന്നതുപോലെ തമാശ പറഞ്ഞ് നടക്കുന്ന സ്വഭാവക്കാരനായിരുന്നില്ല അദ്ദേഹം. വീട്ടിലായിരിക്കുമ്പോൾ വായനയിലും മറ്റുമായി സമയം ചെലവഴിക്കുന്ന ശാന്തനായ മനുഷ്യനായിരുന്നു കൃഷ്ണൻകുട്ടി നായർ.

മാസ്റ്റർബിൻ ചാനലിന് നൽകിയ അഭിമുഖത്തിൽ അദ്ദേഹത്തിന്റെ ഭാര്യയും മക്കളും പങ്കുവെച്ച ഓർമ്മകളിൽ ഒരുപാട് പറയുന്നുണ്ട്.

 അഭിനയിച്ച കഥാപാത്രങ്ങളുടെ പേരിലാണ് മലയാളികൾ അദ്ദേഹത്തെ കൂടുതലായി ഓർക്കുന്നതെങ്കിലും, കുടുംബത്തിന് അദ്ദേഹം സിനിമയിലെ ആ തമാശക്കാരനായ നടനായിരുന്നില്ല.

 മറിച്ച് വായനയെ ഇഷ്ടപ്പെട്ടിരുന്ന, സ്വന്തം ജീവിതത്തിൽ വളരെ ശാന്തനായ ഒരാളായിരുന്നു. 

അർഹിച്ച അംഗീകാരങ്ങൾ ലഭിക്കാതെ പോയ ഒരു നടനായിരുന്നു കൃഷ്ണൻകുട്ടി നായരെന്ന് കുടുംബം കരുതുന്നു. തനിക്ക് ലഭിക്കുന്ന വേഷങ്ങൾ സ്വീകരിച്ച് അവയെ പരമാവധി മികച്ചതാക്കുക എന്നതായിരുന്നു അദ്ദേഹത്തിന്റെ സമീപനം.

 ‘ഇത്തരം കഥാപാത്രങ്ങൾ മാത്രമേ ചെയ്യൂ’ എന്ന വാശിയോടെ അവസരങ്ങൾ നിരസിക്കുന്ന നടനായിരുന്നില്ല അദ്ദേഹം. നല്ല കഥാപാത്രങ്ങൾ ലഭിച്ചിരുന്നെങ്കിൽ അവയും അതേ ആത്മാർത്ഥതയോടെ അവതരിപ്പിക്കുമായിരുന്നുവെന്ന് മകൻ പറയുന്നു.

 എന്നാൽ സിനിമയിൽ ഒരു വേഷം ലഭിക്കുന്നു എന്നത് പലപ്പോഴും നടന്റെ തീരുമാനത്തിന് അപ്പുറത്തുള്ള കാര്യമാണ്. കിട്ടുന്ന അവസരങ്ങളെ ഉപയോഗപ്പെടുത്തുക എന്നതായിരുന്നു കൃഷ്ണൻകുട്ടി നായരുടെ രീതി. 

സിനിമയിൽ നിന്ന് വലിയ സാമ്പത്തിക നേട്ടമൊന്നും അദ്ദേഹത്തിന് ഉണ്ടായിരുന്നില്ലെന്നും കുടുംബം തുറന്നുപറയുന്നു.

അന്നത്തെ കാലത്ത് സിനിമയിൽ നിന്ന് ലഭിച്ചിരുന്ന പ്രതിഫലം വളരെ പരിമിതമായിരുന്നു. ചില സിനിമകളിൽ അഭിനയിച്ചതിന് പ്രതിഫലം പോലും ലഭിച്ചിട്ടില്ലെന്നും ഭാര്യയും മക്കളും പറയുന്നു.

എങ്കിലും കുടുംബത്തിനായി ഒരു വീട് നിർമ്മിച്ചത് അദ്ദേഹമായിരുന്നു.

വലിയ സാമ്പത്തിക സമ്പാദ്യങ്ങൾ ഒന്നും ബാക്കിവെച്ചില്ലെങ്കിലും, മലയാള സിനിമയ്ക്ക് അദ്ദേഹം സമ്മാനിച്ച കഥാപാത്രങ്ങൾ ഇന്നും പ്രേക്ഷകരുടെ ഓർമ്മയിൽ ജീവിക്കുന്നുണ്ട്.

 അഭിനയജീവിതം മുന്നോട്ട് പോകുന്നതിനിടെയാണ് 1995-ൽ ഷൊർണ്ണൂരിൽ വെച്ചുണ്ടായ ഒരു സ്കൂട്ടർ അപകടം അദ്ദേഹത്തിന്റെ ജീവിതത്തെ മാറ്റിമറിച്ചത്.

 അപകടത്തെ തുടർന്ന് ചികിത്സയിലായിരുന്ന അദ്ദേഹം ഏകദേശം ഒരു മാസത്തോളം ആശുപത്രിയിൽ കഴിഞ്ഞു.

എന്നാൽ ജീവിതത്തിലേക്ക് തിരിച്ചെത്താൻ അദ്ദേഹത്തിന് കഴിഞ്ഞില്ല. ഒടുവിൽ 1996 നവംബർ 6-ന് തിരുവനന്തപുരത്ത് വെച്ച് കൃഷ്ണൻകുട്ടി നായർ ഈ ലോകത്തോട് വിടപറഞ്ഞു.

 ഒരു അപകടത്തെ തുടർന്ന് ആശുപത്രിയിൽ കിടന്നിട്ടും ജീവിതത്തിലേക്ക് തിരിച്ചുവരാതിരുന്ന അച്ഛന്റെ മ..രണം ഇന്നും തങ്ങൾക്ക് വലിയ വേദനയാണെന്ന് മക്കൾ പറയുന്നു. 

 നടനായ പിതാവിന്റെ പാത പിന്തുടർന്ന് മകൻ ശിവകുമാർ നായരും മലയാള ചലച്ചിത്രരംഗത്ത് അഭിനേതാവായി സജീവമാണ്.

 ‘സ്റ്റേഷൻ 5’ ഉൾപ്പെടെയുള്ള ചിത്രങ്ങളിൽ അദ്ദേഹം അഭിനയിച്ചിട്ടുണ്ട്. അച്ഛൻ നേടിയതും നേടാതെ പോയതുമായ അംഗീകാരങ്ങളും സിനിമാജീവിതത്തിലെ അനുഭവങ്ങളും ഇന്നും കുടുംബത്തിന്റെ ഓർമ്മകളിൽ നിറഞ്ഞുനിൽക്കുന്നു.

 കൃഷ്ണൻകുട്ടി നായരുടെ സിനിമാജീവിതത്തെ തിരിഞ്ഞുനോക്കുമ്പോൾ, അദ്ദേഹത്തിന് ലഭിച്ച കഥാപാത്രങ്ങളുടെ വലുപ്പത്തേക്കാൾ ശ്രദ്ധേയമായത് അവയെ അദ്ദേഹം അവതരിപ്പിച്ച രീതിയാണ്.

ശരീരഭാഷയുടെ അമിതപ്രകടനങ്ങളില്ലാതെ, ശബ്ദത്തിൽ വലിയ ഉയർച്ചതാഴ്ചകളില്ലാതെ, ചിലപ്പോൾ വെറുമൊരു നോട്ടം കൊണ്ട് പോലും ചിരി സൃഷ്ടിച്ച നടനായിരുന്നു അദ്ദേഹം.

‘തട്ടാൻ ഗോപാലൻ’ മുതൽ എണ്ണമറ്റ ചെറുതും വലുതുമായ കഥാപാത്രങ്ങൾ വരെ, മലയാള സിനിമയുടെ ഒരു കാലഘട്ടത്തെ സ്വന്തം അഭിനയമുദ്ര കൊണ്ട് സമ്പന്നമാക്കിയ കലാകാരനായിരുന്നു കൃഷ്ണൻകുട്ടി നായർ.

 മലയാള സിനിമയ്ക്ക് അദ്ദേഹം നൽകിയ സംഭാവനകൾ കാലം കടന്നുപോയാലും ഓർമ്മിക്കപ്പെടും. ആ നിശ്ശബ്ദനായ വലിയ കലാകാരന്റെ ഓർമ്മകൾക്ക് മുന്നിൽ ആദരവോടെ ഓർമ്മപ്പൂക്കൾ.